დაცული ტერიტორიების სააგენტო

საქართველოს გარემოს დაცვის და სოფლის მეურნეობის სამინისტროს სსიპ დაცული ტერიტორიების სააგენტოს საქმიანობის სფეროს წარმოადგენს სახელმწიფო ნაკრძალების, ეროვნული პარკების, ბუნების ძეგლების, აღკვეთილების, დაცული ლანდშაფტების, ბიოსფერული რეზერვატების, მსოფლიო მემკვიდრეობის უბნების და საერთაშორისო მნიშვნელობის მქონე ჭარბტენიანი ტერიტორიების სისტემის მართვა. საქართველოში დაცული ტერიტორიების დაარსებას დიდი ხნის ისტორია გააჩნია. პირველი დაცული ტერიტორია – ლაგოდეხის სახელმწიფო ნაკრძალი შეიქმნა ჯერ კიდევ 1912 წელს, ამჟამად კი ქვეყნის მასშტაბით 86 დაცული ტერიტორიაა. მათი საერთო ფართობი შეადგენს 595 963 ჰა-ს, რაც ქვეყნის ტერიტორიის 8.55 %-ია. დაცული ტერიტორიების დაახლოებით 53 % ტყით არის დაფარული. სააგენტოს მიზნებს წარმოადგენს დაცული ტერიტორიების მართვის სისტემის გაუმჯობესება, ტერიტორიული ადმინისტრაციების ფუნქციონირების უზრუნველყოფა და კანონმდებლობით დადგენილი წესების დაცვაზე კონტროლი, ახალი დაცული ტერიტორიების დაგეგმვა, შექმნა და განვითარება.